哈巴狗赤兔（下）-中國寵物網

來源：弄堂

作者：胡寶談

講述：吳越狂

審閱、推薦：丁迪蒙

編輯：王乙其

往期回顧：哈巴狗赤兔（上）

哈巴狗赤兔（下） 音頻：進度條 00:00 04:19 后退15秒倍速快進15秒

阿慶兒子又教赤兔搶車位。每日天落班辰光，阿慶嫂手拍拍，赤兔邪氣通人性，馬上躥到弄堂里頭睏好，拿門口停助動車個地方占脫。阿慶兒子勿轉來，啥人也覅想軋一腳。勿識相，狗汪汪汪一叫，比副科想升正科朋友只頭還尖個牙子啀發啀發，總歸叫人有眼抖豁。想勿到過脫兩日天，又勿對頭了，車位日日撥小菜場賣野山參個東北人占脫。阿慶嫂一打聽，又是麥阿姨問人家討去一包人參葉子泡茶，講啥保險解決車位問題。麥阿姨一樣老花頭，一碗擺勒著著高個紅燒肉。搿記阿慶嫂勿響先，勿是悶脫，要做辣貨醬足眼個事體撥對頭嗒嗒。

后頭兩日，里委會選小組長，麥阿姨面皮倒是老，硬做主張，拿肖照貼勒候選人一欄里向。照牌頭，肖照個鈔票嘸沒付，講啥當仔小組長會得多關照關照開照相館個小江西。早浪頭買小菜轉來，啥路道？弄堂里個人看見伊，兩只面孔儕蠻賊腔個？候選人一欄前頭，介許多人啥體筑勒一道？勿用伊軋，大家馬上讓條人弄堂撥伊進去。

赤兔對牢伊個肖照橫叫豎叫，腳爪撲上去恨性命攋仔橫一記豎一記，弄得只面孔一條條，阿三講搿個叫星條旗，美國總統個賣相。“看看看，搿種能個人好選伊伐，連得狗對伊也有意見唻！”“儂講啥人！”麥阿姨三角眼瞪得三角倒過來。阿慶嫂節頭管、衣裳管浪個灰彈彈脫，望肖照浪一指。“啥人末自家看呀！啥體勿望別人肖照浪攋，就是要攋搿張肖照？”

邊浪交關平常日腳勿敢發聲音個朋友，今朝一有人帶頭馬上開電喇叭。“今朝算是碰著赤兔爺叔唻！”“勿是碰著赤兔，叫伊碰著赤佬唻！”“人勒做，天勒看。天公公看勿過去，派三只眼條神仙狗下來脫伊校路子，曉得伐？”連下來怪閑話多來，講狗是弄堂里啥人啥人，死勒文化大革命風頭浪，乃朝改革開放浪頭浪又轉來哉。麥阿姨要發格又發勿出，狗攋伊肖照，做夢也朆做著，也做勿出搿排事體呀，人告狗斗去，又加鴨屎臭，看伊笑話個人又加有講頭來。

搿記冷夯頭只好吃進，氣潽潽轉去。到底哪能樁事體呢？有人講，阿慶嫂半夜里迓迓叫起來，拿紅燒肉個肉滷刮勒麥阿姨肖照個背后頭。有人講，是橄欖出個好主意，做是阿慶兒子去做個。還有人講，麥家爺叔大義滅親，麥阿姨勒弄堂里窮兇霸道，作興到辰光啥人勿投伊票，伊要告人家硬上，撳頭割耳朵撳牢人家選伊，真撥伊選上去個說話，勿是害人嘛。

麥阿姨呢，一口咬定是狗中邪，勿是伊碰著赤佬，是狗碰著赤佬。

——————————————————

丁迪蒙

迪蒙，啟迪蒙昧者也。上海市人。原上海大學中文系教師，多年來一直致力于滬語和海派文化的傳承。滬語是吳方言的代表方言，是吳儂軟語的典范。她既可以用來拉家常，也同樣可以用來朗讀各類詩歌散文。滬語完全可以書寫，同粵語可以寫作是一樣的。本平臺所有文章都是經過改寫后，用滬語來演繹的，漢字書寫也是正確的。